ពិធីបុណ្យពូនភ្នំខ្សាច់ផ្តាច់កម្មពៀរ សម្រាប់សត្វលោកទាំងឡាយដែលកើតចាស់ ឈឺ ស្លាប់ កាលបើមិនទាន់ដល់មរណៈ តែងតែវិលវល់ក្នុងវាលវដ្តសង្សារ អាចកើតនៅទីនេះ ទីនោះអាស្រ័យទៅតាមកម្ម ហើយកម្មផលទំាងនោះមានបីយ៉ាង គឺអតីតជាតិ បច្ចុប្បន្នជាតិ និងអនាគតជាតិ។ ដើម្បីប្រាថ្នាកន្លែងកើត ឲ្យអនាគតជាតិរបស់ខ្លួនទទួលបានអានិសង្ឃច្រើន មុនពេលផុតរលត់សង្ខារទៅមនុស្សគ្រប់រូប តែងតែធ្វើបុណ្យដាក់ទាន និងធ្វើបុណ្យកុសលផ្សេងៗគ្រប់រូបភាពជាដើម។
ការពូនភ្នំខ្សាច់
«ប្រជាជនកម្ពុជាយើង ធ្លាប់អនុវត្តតាំងពីដើមមក ដោយសារតែពួកគាត់មានជំនឿថា ការពូនភ្នំខ្សាច់នេះ គឺដើម្បីផ្តាច់កម្មផ្តាច់ពារដែលយើងធ្លាប់សាងពីមុនមក។ ខ្ញុំសុំឲ្យពូនភ្នំខ្សាច់នេះ ផ្តាច់កម្មផ្តាច់ពៀរនេះ ដល់ពេលខ្ញុំមានកម្មមានពៀរអី ដែលមានសត្វដែលខ្ញុំធ្វើអត់ដឹង ពីមុនៗមក ឲ្យខ្ញុំផ្តាច់ពារ ដោះទុកកម្មពៀររបស់ខ្ញុំផង។ និយាយរួមសាងកុសលសម្រាប់ខ្លួនយើងផង និងសម្រាប់ញាតិការយើងផង…»។
ប្រជាពលរដ្ឋមួយចំនួនកំពុងឈរនៅមុខកន្លែងពូនភ្នំខ្សាច់ ដៃម្ខាងកាន់ចានដាក់ដីខ្សាច់ អង្ករ និងធូបសម្រាប់អុជ នៅក្នុងវត្តចង្ក្រានតាព្រហ្ម ឬហៅវត្តស្ទឹងមានជ័យ នៅរាជធានីភ្នំពេញ ដើម្បីសុំសេចក្តីសុខចម្រើនទាំងជាតិនេះ និងជាតិខាងមុខ។
ភ្នំខ្សាច់គេអាចពូនពីដីខ្សាច់ អង្ករ និងស្រូវ គឺពូនធ្វើដូចជាភ្នំ។ ពិធីនេះមិនមែនមាននៅតែវត្តចង្ក្រានតាព្រហ្មទេ គឺនៅតាមវត្តអារាមនានា នៅកម្ពុជាជាង៤ពាន់វត្ត សុទ្ធតែបានរៀបចំធ្វើក្នុងអំឡុងបុណ្យភ្ជុំបិណ្ឌនេះ។ ជំនឿអរូបិយនៅកម្ពុជា ទាក់ទងនិងពិធីពូនភ្នំខ្សាច់ផ្តាច់កម្មពៀរ តាមបែបប្រពៃណីនិយម នៃព្រះពុទ្ធសាសនារបស់រដ្ឋ ដែលដូនតាបុព្វបុរសខ្មែរបន្សល់ទុកដល់កូនចៅជំនាន់ក្រោយ រហូតមកដល់ពេលបច្ចុប្បន្ននេះ។ ពិធីពូនភ្នំខ្សាច់នេះ មានចារនៅក្នុងគម្ពីរសាស្ត្រាស្លឹករឹតខ្មែរ និងសៀភៅព្រះរាជពិធីទ្វារទស្សមាស ដែលបោះពុម្ពផ្សាយដោយវិទ្យាស្ថានពុទ្ធិសាសនបណ្ឌិត្យផងដែរ។
សាស្ត្រាចារ្យនៃពុទ្ធិកសាកលវិទ្យាល័យ ព្រះសីហនុរាជ្យ ព្រះតេជគុណ ពុទ្ធំកុល វ៉ង់ សុភស្ត មានសង្ឃដីកាថា ពិធីពូនភ្នំខ្សាច់នេះ ធ្វើឡើងតាមបែបពុទ្ធនិយម គឺមិនចំជាលក្ខណៈព្រះពុទ្ធសាសនាសុទ្ធសាធនោះទេ។ ព្រះតេជគុណមានថេរតីកាថា៖ “ធ្វើមិនដែលខានទេ ទាល់តែមានពិធីបុណ្យចូលឆ្នាំ បុណ្យភ្ជុំបិណ្ឌហ្នឹង គឺត្រូវតែមានពិធីពូនភ្នំខ្សាច់ហ្នឹង ដើម្បីរំដោះកម្មរំដោះពៀរ កម្មពៀរដែលយើងធ្លាប់មានពីមុនមកហ្នឹង ក៏ដោយអនិសង្ឃនៃការពូនភ្នំខ្សាច់ហ្នឹង សុំឲ្យបានរួចរំដោះកម្មពៀរអ៊ីចឹង នេះជាប្រពៃណីទេ ប្រពៃណីបែបពុទ្ធនិយម មិនចំជាលក្ខណៈព្រះពុទ្ធសាសនាសុទ្ធសាធទេ ប្រពៃណីខ្មែរយើងច្របាច់បញ្ចូលជាមួយនឹងព្រះពុទ្ធសាសនា បើនិយាយទៅ”។
ជារៀងរាល់ឆ្នាំ ប្រជាពលរដ្ឋខ្មែរទូទាំងប្រទេសកម្ពុជា តែងតែប្រារព្ធពិធីពូនភ្នំខ្សាច់ផ្តាច់កម្មពៀរនេះ នៅក្នុងពីធីបុណ្យប្រពៃណីជាតិ ដូចជាបុណ្យចូលឆ្នាំប្រពៃណីជាតិ បុណ្យបច្ច័យបួន បុណ្យកត្តញ្ញូ បុណ្យឆាកមហាបង្សុកូល និងបុណ្យភ្ជុំបិណ្ឌជាដើម។
ពិធីពូនភ្នំខ្សាច់នេះ ជាពិធីមួយដែលមានមុនសម័យព្រះពុទ្ធអង្គម្ចាស់សាមណគោត្តមទៅទៀត។ ពិធីនេះត្រូវបានព្រះសម្មាសម្ពុទ្ធ ទ្រង់ផ្តល់ឱវាទឲ្យស្តេចគ្រប់គ្រងផែនដី ប្រារព្ធធ្វើតាមបែបព្រះពុទ្ធសាសនា តាំងពីពេលនោះរហូតដល់សព្វថ្ងៃ។
ប្រវត្តិនៃពិធីពូនភ្នំខ្សាច់ផ្តាច់កម្មពៀរ
ព្រះតេជគុណពុទ្ធំកុល វ៉ង់ សុភស្ត មានសង្ឃដីកាទៀតថា ពិធីពូនភ្នំខ្សាច់ផ្តាច់កម្មពៀរ តាមបែបប្រពៃណីនិយមនៃព្រះពុទ្ធសាសនាខ្មែរនេះ ដើមឡើយមានប្រវត្តិទាក់ទងទៅនឹងទេវបុត្រមួយអង្គទៅកើតនៅឋានតាវតឹង នៅថ្ងៃមួយត្រូវអស់អាយុ ដោយយមបាល និងយមរាជប្រាប់ទេវបុត្រថា នៅ៧ថ្ងៃទៀត និងត្រូវធ្លាក់ទៅឋាននរក ពីព្រោះទេវបុត្រមានបាបកម្មប្រព្រឹត្តដាច់សីលប្រាំពីរជាតិមុនមក។ ឮដូច្នេះទេវបុត្រភ័យយ៉ាងខ្លាំង ស្រាប់តែមហេសីជ្រាបរឿងថា យមរាជ និងចាប់ប្តីរបស់ខ្លួន ក៏ចាប់ផ្តើមពូនភ្នំខ្សាច់នៅឋានតាវត្តិង្សនោះ ដើម្បីផ្តាច់កម្មពៀរឲ្យរួចផុតពីសេចក្តីស្លាប់៖ “ទាំងអស់គ្នាកុំអាលទាន់នាំយកប្តីរបស់យើង ទៅកាន់ឋាននរក ពីព្រោះប្តីរបស់យើង បានធ្វើពិធីពូនភ្នំខ្សាច់បូជាទៅដល់ព្រះជោលាមុនីចេតិយ បូជាចំពោះគុណព្រះរតនត្រ័យហើយ អ៊ីចឹងបើអ្នកទាំងអស់គ្នា ចង់ចាប់ស្វាមីរបស់យើងទៅកាន់ឋាននរក អ្នកឯងទាំងអស់គ្នាហ្នឹងត្រូវរាប់គ្រាប់ខ្សាច់ឲ្យអស់ជាមុនសិន គ្រាប់ខ្សាច់ដែលពូនភ្នំខ្សាច់ហ្នឹង បើរាប់គ្រាប់ខ្សាច់ដែលពូនភ្នំខ្សាច់ហ្នឹងមិនអស់ទេ អ្នកឯងមិនអាចយកស្វាមីយើងទៅបានទេ អ៊ីចឹងទៅពួកយមបាលយមរាជហ្នឹង ក៏នាំគ្នារាប់ រាប់តាំងពីព្រឹករហូតដល់ថ្ងៃត្រង់ រហូតដល់ព្រលប់ ដល់យប់ទៀត នៅតែរាប់មិនអស់ គំនរភ្នំខ្សាច់ហ្នឹងវាចេះតែគរខ្ពស់ឡើងៗអ៊ីចឹងទៅ អ៊ីចឹងទៅក៏សុំចុះចាញ់នាងជាភរិយាហ្នឹង ថាស្វាមីរបស់នាងបានធ្វើការបូជាពូនភ្នំខ្សាច់រំដោះកម្មរំដោះពៀរ អ៊ីចឹងទៅយើងមិនអាចនាំយកទៅបានទេ”។
តើពិធីពូនភ្នំខ្សាច់ផ្តាច់កម្មពៀរ មានន័យយ៉ាងដូចម្តេច?
ទំនៀមទម្លាប់ប្រារព្ធពិធីពូនភ្នំខ្សាច់ផ្តាច់កម្មពៀរនេះ មានអត្ថន័យ៣យ៉ាង៖
អត្ថន័យទី១- សម្ដែងថាពិធីពូនភ្នំខ្សាច់ប្រារព្ធឡើង ដើម្បីឧទ្ទិសដល់ព្រះមុនីចេតិយរបស់ព្រះសម្មាសម្ពុទ្ធ ដែលតាំងនៅឯស្ថានតាវត្តិង្ស។ មានន័យថា ភ្នំខ្សាច់ដែលគរលើគ្នានោះ ប្រៀបបានដូចជា កូនភ្នំមួយ តំណាងឲ្យព្រះចេតិយដែលមានតម្កល់ព្រះសារីរិកធាតុ (ព្រះអដ្ឋិធាតុនៃព្រះសម្មាសម្ពុទ្ធ)។ ហេតុនេះនៅពេលដែលអ្នកបានពូនភ្នំខ្សាច់ហើយនោះ គឺហាក់បីដូចជាអ្នកបានចូលរួមកសាងព្រះចេតិយថ្វាយព្រះសម្មាសម្ពុទ្ធ។ ជាលទ្ធផលអ្នកដែលបានពូនភ្នំខ្សាច់នោះ និងទទួលបានអានិសង្ឃខ្ពស់បំផុត។
អត្ថន័យទី២- ការធ្វើពិធីពូនភ្នំខ្សាច់ និងបានរំដោះកម្មពៀរ ដែលខ្លួនធ្លាប់បានសាងពីមុនមក។ មានន័យថា ប្រសិនបើអ្នកមានកម្មពៀរដោយហេតុធ្លាប់បានសម្លាប់សត្វ ឬបៀតបៀនអ្នកដទៃពីមុន ឬពីជាតិមុន។ ម្យ៉ាងទៀតបើគេចង់មកចងកម្មពៀរ ឬយកជីវិតអ្នកវិញ យមរាជត្រូវតែរាប់ចំនួនគ្រាប់ខ្សាច់ ដែលអ្នកបានពូននោះឲ្យអស់សិន ទើបអាចមកយកជីវិតអ្នក ឬមកយកកម្មពៀរពីអ្នកបាន។ តែផ្ទុយទៅវិញ បើមិនអាចរាប់ចំនួនគ្រាប់ខ្សាច់នេះឲ្យអស់ទេនោះ មានន័យស្មើនឹងអ្នកបានរំដោះកម្ម រំដោះពៀរពីសត្វនោះហើយ។ (តាមទ្រឹស្ដីព្រហ្មមញ្ញសាសនា)។
អត្ថន័យទី៣៖ មានន័យខុសប្លែកពីទ្រឹស្ដីបែបសាសនាខាងលើនេះ តាមការសង្កេតជាក់ស្តែងនៅតាមវត្តអារាមមួយចំនួន ជាពិសេសនៅទីជនបទ មានការខ្វះខាតខ្សាច់ធ្វើសំណង់អ្វីមួយ គឺព្រះសង្ឃ ឬគណៈកម្មការវត្ត អនុញ្ញាតឲ្យមានពិធីពូនភ្នំខ្សាច់នេះឡើង បន្ទាប់មកគេយកខ្សាច់នោះទៅប្រគេនព្រះសង្ឃ ដែលត្រូវការវត្ថុធាតុដើមដីខ្សាច់នោះ។
តើត្រូវធ្វើដូចម្តេចខ្លះនៅមុនពេលពូនភ្នំខ្សាច់ និងក្រោយពេលពូន?
មុនពេលពូន គេត្រូវរៀបចំសម្ភារៈមួយចំនួនដូចជា ធូប អង្ករ ស្រូវ ល្ងរ លុយជាដើម។ ការពូនភ្នំខ្សាច់នេះដែរ គេត្រូវធ្វើរបងព័ទ្ធជុំវិញភ្នំខ្សាច់ទាំងនោះ និងរៀបចំពូនបានតិច ឬច្រើន តាមតែចិត្តរបស់យើង បន្ទាប់មកត្រូវទុកផ្លូវចេញចូល សម្រាប់អ្នកទៅពូនភ្នំខ្សាច់នោះ។ នៅពេលពូនភ្នំខ្សាច់នោះដែរ ត្រូវមានលោកអាចារ្យជួយដឹកនាំ សូត្របាលីមុនពេលពូន ឬបើលោកអ្នកចេះសូត្រដោយខ្លួនឯងក៏បានដែរ ដោយសូត្រទៅតាមវគ្គ និងឃ្លោងឃ្លារបស់ព្រះធម៌។
ពិធីពូនភ្នំខ្សាច់ផ្តាច់កម្ម ផ្តាច់ពៀរ តាមទំនៀមទម្លាប់របស់ដូនតា គេអាចពូនជាភ្នំ៣ តំណាង ព្រះពុទ្ធ ព្រះធម៌ ព្រះសង្ឃ។ ពូនភ្នំ៥ តំណាងឲ្យព្រះពុទ្ធប្រាំអង្គ។ ពូនភ្នំ៧ តំណាងឲ្យញាតិកាប្រាំពីរសន្តាន។ មិនត្រឹមតែប៉ុណ្ណោះទេ គេក៏អាចពូន១២ភ្នំ ឬច្រើនជាងហ្នឹងក៏បាន ពីព្រោះភ្នំខ្សាច់ដែលគេពូននោះ គេអាចបំបួសអធិដ្ឋានភ្នំខ្សាច់នោះ ឲ្យក្លាយទៅជាជោលាមុនីចេតិយ៍។ ដោយឡែកការពូនភ្នំអង្ករ ភ្នំស្រូវជាដើម ប្រជាពលរដ្ឋខ្មែរទូទាំងប្រទសអាចធ្វើបានទាំងអស់ ហើយបុណ្យកុសលទទួលបានដូចគ្នា និងការពូនភ្នំខ្សាច់ដែរ។
សាស្ត្រាចារ្យនៃពុទ្ធិកសាកលវិទ្យាល័យ ព្រះសីហនុរាជ្យ ព្រះតេជគុណ ពុទ្ធំកុល វ៉ង់ សុភស្ត មានសង្ឃដីកាថា បន្ទាប់ពីពូនភ្នំខ្សាច់នេះហើយ អ្នកដែលមានបំណងទៅធ្វើបុណ្យអាចចូលទៅធ្វើបុណ្យបានតាមប្រពៃណី ដោយយកដីខ្សាច់ដាក់ក្នុងចាន ឬផ្តិល ពូនសុំសេចក្តីសុខ និងឧទ្ទិសឋានដល់ញាតិសន្តានដែលបានចែកឋានទៅបរមលោកខាងមុខជាដើម ដើម្បីឲ្យទទួលបានកុសលផលបុណ្យដែលកូនចៅបានធ្វើ។
ព្រះតេជគុណ ពុទ្ធំកុល វ៉ង់ សុភស្ត មានសង្ឃដីកាទៀតថា នៅពេលបញ្ចប់កម្មវិធីបុណ្យ តាអាចារ្យ ត្រូវសូត្របាលី ផ្សឹកភ្នំខ្សាច់នោះវិញ ឲ្យទៅជាដីខ្សាច់ធម្មតា មុននឹងយកទៅធ្វើយកទៅកសាងផ្លូវ របងវត្ត វិហារជាដើម ជៀសវាងការធ្វើខុសខ្លាចមានបាបកម្ម៖ “ចប់ពិធីបុណ្យភ្ជុំបិណ្ឌដាក់បិណ្ឌ ១៤ថ្ងៃ ១៥ថ្ងៃហ្នឹងទៅ ដល់ថ្ងៃទី១៦ហ្នឹង មុននឹងយកខ្សាច់ហ្នឹងទៅប្រើប្រាស់យកទៅធ្វើលាយស៊ីម៉ង់ចាក់បេតុង កសាងកុដិ សាលា ព្រះវិហារអី យើងត្រូវផ្សឹកភ្នំខ្សាច់ហ្នឹងសិន មានបាលី បើសិនជាយើងអត់បានផ្សឹកទេ យើងអត់បានបច្ចូស ឬក៏ថារំលាយភ្នំខ្សាច់ហ្នឹងជាមុនទេ អាហ្នឹងវាឈ្មោះថាយើងរំលាយព្រះចេតិយ ហ្នឹងមានទោសមានបាប អ៊ីចឹងគេត្រូវធ្វើពិធីផ្សឹកសិន ផ្សឹក ឬបច្ចូស”។
គោលបំណងនៃពិធីពូនភ្នំខ្សាច់
ពិធីពូនភ្នំខ្សាច់ធ្វើឡើងក្នុងគោលបំណង ផ្តាច់កម្មពៀរពីបច្ចុប្បន្នជាតិ និងអតីតជាតិ ដែលមនុស្សលោកបានសាងដូចជា បានសម្លាប់សត្វតូច សត្វធំ សត្វវា សត្វលូន សត្វជើងពីរ សត្វជើងបួន មនុស្ស ឬមានកាយវាចាចិត្តមិនល្អពីមុន ដោយចេតនាក្តី ដោយអចេតនាក្តី ឲ្យរួចផុតកម្ម ផុតពៀរទាំងពួងទៅជាអហោសិកម្ម។ លើសពីនេះទៀត ការចេះសន្សំកុសលផលបុណ្យទុកសម្រាប់អនាគតជាតិ ដើម្បីឲ្យជាតិមុខសោយសុខនូវសម្បត្តិ៤ប្រការ គឺអាយុ វណ្ណៈ សុខៈ ពានៈ បដិពានៈ កុំបីឃ្លាងឃ្លាតឡើយ។
ម្យ៉ាងទៀត ការធ្វើពិធីពូនភ្នំខ្សាច់នេះទៀតសោត គឺធ្វើឡើងដើម្បីជាភ្នំមួយតំណាងដល់ព្រះជោល្លាមុន្នីចេតិយ ដែលដាក់តម្កល់ព្រះចង្កូមកែវ ឬព្រះសរីរិកធាតុរបស់ព្រះពុទ្ធគ្រប់ព្រះអង្គ ដែលតម្កល់នៅឋានត្រៃត្រិង្ស ឋានសួគ៌ជាន់ទី២។
អត្ថប្រយោជ៍នៃពិធីពូនភ្នំខ្សាច់
គុណប្រយោជន៍នៃការធ្វើពិធីបុណ្យពូនភ្នំខ្សាច់ផ្តាច់កម្មពៀរ គឺកុសលផលបុណ្យ និងកើតមានដល់អ្នកដែលធ្វើនៅពេលបច្ចុប្បន្ន អនាគត នឹងជាតិក្រោយបន្តទៀត បើអ្នកដែលធ្វើនោះ មានសេចក្តីជ្រះថ្លា ហើយបុណ្យដែលបានធ្វើច្រើនជាងធ្វើបាប។
អាជីវករ អ្នករត់ម៉ូតូឌុប អ្នករត់កង់បី អ្នកធ្វើការរដ្ឋ និងឯកជន ឲ្យដឹងថាមូលហេតុដែលពួកគេមកធ្វើបុណ្យពូនភ្នំខ្សាច់ផ្តាច់កម្មពៀរ ដើម្បីឲ្យបច្ចុប្បន្នជាតិ និងអតីតជាតិ ដែលពួកគេបានប្រព្រឹត្តដូចជា សម្លាប់សត្វ មនុស្ស ឬមានកាយវាចាចិត្តមិនល្អពីមុន ដោយចេតនាក្តី ដោយអចេតនាក្តី ឲ្យរួចផុតកម្ម ផុតពៀរទាំងពួងទៅជាអហោសិកម្ម។
លើសពីនេះទៀត ការសន្សំបុណ្យកុសលនៅពេលបច្ចុប្បន្ន ក៏នាំឲ្យក្រុមគ្រួសារ សាច់ញ្ញាតិរបស់ពួកគេ ទទួលបានសេចក្តីសុខគ្រប់ជាតិទៀតផង៖ “រាប់បាត្រឧទ្ទិសកុសល្យផលបុណ្យ ជូនឪពុកខ្ញុំហើយនិងជីដូនជីតាខ្ញុំ ដែលបានចែកឋានទៅហ្នឹង ឲ្យគាត់បានសេពសោយនូវចំណីអាហារដែលខ្ញុំធ្វើហើយ ឲ្យគាត់ឲ្យពរឲ្យជ័យដើម្បីផ្តាច់កម្មផ្តាច់ពៀរ បើសិនមានជ្រុលជ្រួសជាមួយគាត់ក្នុងជាតិនេះ ហើយសម្រាប់ទៅជាតិក្រោយ សម្រាប់កូនចៅខ្ញុំ គ្រួសារខ្ញុំ។ ខ្ញុំមកនេះដើម្បីពូនភ្នំខ្សាច់ ផ្តាច់កម្មផ្តាច់ពៀរ តែខ្ញុំឲ្យអនាគតជាតិទៅ កុំឲ្យមានកម្មមានពៀរដូចជាតិនេះទៀត។ តែអ្វីដែលប៉ាម៉ាក់ខ្ញុំគាត់ប្រាប់មក ក៏ដូចជាចាស់ៗមួយចំនួន គាត់ថាពេលដែលយើងមកធ្វើបុណ្យអ៊ីចឹង យើងឧទ្ទិសជូនឈ្មោះគាត់អ៊ីចឹងទៅ បើសិនយើងចាំឈ្មោះគាត់មិនបានទេ យើងហៅញាតិការទាំង៧សន្តានអ៊ីចឹងទៅ បើសិនជាយើងចាំឈ្មោះច្បាស់លាស់ យើងប្រាប់ជាឈ្មោះអ៊ីចឹងទៅ យើងសូមឲ្យគាត់មកកន្លែងទីតាំងវត្ត ដែលយើងបានមកធ្វើបុណ្យអ៊ីចឹងហើយ សូមឲ្យអនុមោទនាទទួលយកមគ្គផល ដែលបានពីហ្នឹងទៅ ដើម្បីជួយគាត់ខ្លះដែរ ព្រោះយើងមិនដឹងថាពេលដែលគាត់ចែកឋានទៅហ្នឹង យើងមិនដឹងថាគាត់ទៅទីណាទេ តែយើងធ្វើអ៊ីចឹងដើម្បីជួយឲ្យគាត់មកដើម្បីយកមគ្គផល ហើយឲ្យគាត់ជួយថែរក្សាឃុំគ្រងគ្រួសារឲ្យបានក្តីសុខក្តីចម្រើនតទៅទៀត។ ធ្វើកម្មអ្វីមួយ យើងធ្វើជាតិនេះ ដើម្បីផ្តាច់កម្មផ្តាច់ពៀរ ជាតិក្រោយឲ្យជួបតែល្អ”។
ទាក់ទងនិងការពួនភ្នំខ្សាច់នេះដែរ សាស្ត្រាចារ្យនៃពុទ្ធិកសាកលវិទ្យាល័យព្រះសីហនុរាជ្យ ព្រះតេជគុណ វ៉ង់ សុភ័ស្រ មានសង្ឃដីកាទៀតថា អ្នកដែលធ្វើបុណ្យសន្សំកុសលនៅក្នុងជាតិនេះ នៅជាតិខាងមុខ អ្នកនោះនឹងទទួលបានរូបសម្បត្តិល្អ សេចក្តីសុខចម្រើន មិនត្រឹមតែប៉ុណ្ណោះទេ បុណ្យកុសលទាំងនោះអាចចែករំលែកទៅឲ្យញាតិសណ្តានដែលចែកឋានហើយក្តី ក៏អាចទទួលបានកុសលផលបុណ្យផងដែរ៖ “ម្ចាស់ទាន ដែលនៅរស់សព្វថ្ងៃហ្នឹងក៏បានអនិសង្ឃ ហើយគាត់ក៏អាចឧទ្ទិសបុណ្យដែលកើតអំពីការពូនភ្នំខ្សាច់នេះ ដល់ពពួកញាតិដែលស្លាប់ទៅហ្នឹង តាមផ្លូវចិត្ត តាមផ្លូវមនោសញ្ចេតនា ជាលក្ខណៈអរូបិយ យើងឧទ្ទិសកុសលហ្នឹងជូនដល់បុព្វការីជន មាតាបិតា ជីដូនជីតា ដែលលោកចាកឋានទៅហ្នឹងអាចឧទ្ទិសបាន ហើយប្រសិនបើគាត់បានដឹង ជីដូនជីតាញាតិមិត្តបងប្អូនលោកបានដឹង លោកអនុមោទនាទៅ ក៏បានទទួលចំណែកបុណ្យ បានរួចចាកផុតពីសេចក្តីសុខដែរ ដោយសារអនិសង្ឃរបស់បុណ្យបាន”។
ស្នាក់នៅវត្តចង្ក្រានតាព្រហ្ម រាជធានីភ្នំពេញ យាយជី ប៉ែន ពៅ ព្រះជន្ម៦៩ឆ្នាំ មានប្រសាសន៍ថា អ្នកដែលមកធ្វើបុណ្យពូនភ្នំខ្សាច់ ផ្តាច់កម្មពៀរ បានបុណ្យច្រើន ឬតិចអាស្រ័យលើអំពើបាបរបស់ខ្លួនបានប្រព្រឹត្ត។ លោកយាយ ក៏អំពាវនាវឲ្យប្រជាពលរដ្ឋទាំងអស់ត្រូវខិតខំសន្សំកុសលឲ្យបានច្រើន ដើម្បីឲ្យជាតិនេះ និងជាតិខាងមុខទទួលបានសេចក្តីសុខចម្រើន៖”ផ្តល់យោបល់ឲ្យអ៊ីចឹង ហើយឲ្យគាត់ធ្វើបុណ្យទៅឲ្យដាច់កម្មដាច់ពៀរអ៊ីចឹង ធ្វើម៉េចបើជួនណាគ្នាអត់ដឹង គ្នាចេះតែដាក់ៗទៅ ដល់យើងប្រាប់គ្នាទៅ គ្នាយល់ទៅ វាបានបុណ្យបានកុសលហ្នឹងដល់អ្នកធ្វើបុណ្យ ដល់ទាំងអ្នកចែកឋានទៅដែរ”។
គួរបញ្ជាក់ថា ពិធីបុណ្យភ្ជុំបិណ្ឌនេះ ធ្វើឡើងក្នុង១ឆ្នាំម្តង គឺថ្ងៃកាន់បិណ្ឌចាប់ផ្តើមពីថ្ងៃ១រោជ ខែភទ្របទ រហូតដល់ថ្ងៃទី១៤រោជខែដដែល ចំណែកថ្ងៃ១៥រោជ ជាថ្ងៃភ្ជុំធំដែលគេហៅថា ថ្ងៃភ្ជុំបិណ្ឌ៕
